NA‘T-I HABÎB-İ RAHMÂN

 
Envâ-ı derde dermân afv ü mağfirete fermân na‘t-ı Habîb-i Rahmân
Sallallahu teâlâ aleyhi ve alâ âlihî ve ashâbihî ecma‘in
ve alâ cemi‘i’l-enbiyâ-i ve’l- mürselîn
ve alâ âlihim ve ashâbihim
ecma‘în

Yâdigârımdır sana ey nûr-i dil cennet-i a‘lâda zevk-ı selsebîl
Dâreynde Hak sizi mansûr, envâ-i ikrâm ile mesrur ede
 

Sana kurbân olam envâr-ı vahdet
Eyâ ey matla-‘i mâh-ı hidâyet
İmâm-ı enbiyâ mihr-i seâdet
Ezel neyyir-i kubbe-i risâlet
Sebeb-i hilkat-i her dü-serâsın
Heyûlân nûr- i Hak hayru’l- verâsın

Ezelden câlis-i taht-ı “ev-ednâ”
Ki sensin kenz-i esrâr-ı “mâ-evhâ”
Vücûdun menzil-i nûr-i tecellâ
Sana vassâf olub Zât-ı Teâlâ
Sebeb-i hilkat-i her dü-serâsın
Heyûlân nûr-i Hak hayru’l- verâsın

Hidâyet mâdeni cûd-i vücûdun
Bu kâinât senin eser-i cûdun
Ezelden tâ ebed dâim sücûdun
Ubûdiyyetde müstakîm vücûdun
Sebeb-i hilkat-i her dü-serâsın
Heyûlân nûr-i Hak hayru’l- verâsın

Gülistân-ı risâletde gül-i ter
Nübüvvet bahçesinde verd-i ahmer
Hüve’l- evvel hüve’l- âhir peygamber
Hüve’z- zâhir hüve’l- bâtın münevver
Sebeb-i hilkat-i her dü-serâsın
Heyûlân nûr-i Hak hayru’l- verâsın

Ezelden tâ ebed meşrık-ı envâr
Livâ-i Levlâk ile ol kerem-kâr
Burak-ı na‘lidir seb‘a-i seyyâr
Sana dest-bestedir ebrâr u ahyâr
Sebeb-i hilkat-i her dü-serâsın
Heyûlân nûr-i Hak hayru’l- verâsın

Bu mevcûd rûhuna verir hayâtı
Muzayyâ eyledin bu kâinâtı
Hudâ verdi sana bu mûcizâtı
Yarattı hürmetine mahlûkātı
Sebeb-i hilkat-i her dü-serâsın
Heyûlân nûr-i Hak hayru’l- verâsın

MUHAMMED LUTFÎ dergâhına sâil
Bu sâil ola merhamete nâil
Keremin gözlemekde bu sâil
Bu dergâhın ihsânına olmaz hâil
Sebeb-i hilkat-i her dü-serâsın
Heyûlân nûr-i Hak hayru’l- verâsın

***

Arş-ı vahdet güneşi Hazret-i Muhtâr-ı Hudâ
Sohbet-i zâtı verir dillere envâr-ı hüdâ

Cûd-i vücûdu ola hilkat-i eşyâ sebebi
Rahmetenli’l-âlemîn Zât-ı Hudâ müntehabi

Der-i deryâ-yı kerem âleme rahmet-i Rahîm
Dest-gîr-i fukarâdır dü-serâda o Kerîm

Hilkat-i aslı ise nûr-i Hudâ mihr-i hüdâ
Kevser-i ilm-i ledün künûz-i hikmet-i Hudâ

Reşk eder enbiyâlar ümmet-i merhûmesine
Cibrîlân hayret eder esrâr-ı mektûmesine

Kütüb-i münzelenin memdûhi Muhtâr-ı Hakîm
Vâsıf-ı vasfı ola çâr-kütübde O Kadîm

Kim eder şânına şâyân ola evsâf-ı cemîl
Sana meddâh olıcak ilm-i ezel Zât-ı Celîl

LUTFİYÂ şân u şerâfât-i kadîmdir ezelî
O’nu halk etdi güzel öyle güzeller güzeli