|
ZİHÎ DERYÂ Kİ KATREDEN GÖRİNDİ
Zihî deryâ ki katreden görindi
Ne deryâdur ne katredür gör indi
‘Aceb katre ki deryâ anda mahfî
Bu mahfî sırrı sen senden sor indi
Murâdı on sekiz bin ‘âlemün sen
Bu gaflet pes sana sendendür indi
Sana gel sen seni sende bulıgör
Sana bak sendeki bil kimdür indi
Fenâ ol kim bulasın zevk-i vuslat
Bu sözüm düş midür sana yor indi
Hicâb-ı nûr u zulmet külli sende
Niçe sen sen niçe ben ben tur indi
Sana senden yakındur aşrı tap bak
Yoran mülkine sultân ol yor indi
Asılda ‘âşık u ma‘şûk u ‘ışk bir
Bu birden gerçi kim yüz bin görindi
Eger âyîne bin olsa bakan bir
Gören bir görinen bin bin görindi
Saladur kime gark olmak dilerse
Yûnus bu bahre gavvâs ol gir indi
|
