1. Ser-i jûlîdemi mürg-i hevâya lâne itdün sen
Beni mecnûn misâli 'âkıbet dîvâne itdün sen
2. Ser-i gîsûya şâyân görmeyüp atdun beyâbâna
Dil-i sad-çâkimi dendân-ı şikeste-şâne itdün sen
3. Olur her dem nigâhun bâde-peymâ zîr-i ebrûda
'Acebdür kûşe-i mihrâbı sahbâ-hâne itdün sen
4. Ne hâcet sâgar-ı hûn-âbe-rîz-i çeşm-i giryâna
Nigâh-ı 'işve-bâzunla beni mestâne itdün sen
5. Misâl-i kıssa-i Ferhâd u Şîrîn dâsitân oldı
Senünle ser-güzeştim söylenür efsâne itdün sen
6. Sarîr-i kilkim oldı nâle-pîrâ sûz-ı hasretle
Beni bülbül kibi feryâd-zen pervâne itdün sen
7. Misâl-i Hâzık-ı şeydâ ümîd-i künc-i vaslunla
Ne hâtırlar ne diller ey perî vîrâne itdün sen
1. Dağınık (karışmış) saçımı heves (veya gök) kuşuna yuva ettin;
Beni sonunda Mecnun gibi divane (deli) ettin sen.
2. Yüz parça olmuş gönlümü saçının ucuna lâyık görmeyip çöle attın;
(Böylece) kırık tarağın dişi gibi ettin sen.
3. Bakışın her an kaşının altından şarap sunar (ölçer) olur;
Şaşılacak şeydir ki mihrabın köşesini meyhane ettin sen.
4. Ağlayan gözün kanlı yaş döken kadehine ne hacet (ne gerek var);
İşveli (cilveli) bakışınla beni sarhoş (mestâne) ettin sen.
5. Ferhat ile Şirin'in hikayesi gibi dillere destan oldu;
Seninle başımdan geçenler söylenir, (beni) efsane ettin sen.
6. Kalemimin cızırtısı hasret ateşiyle feryat edip inleyen (nâle-pîrâ) oldu;
Beni bülbül gibi feryat eden pervaneye çevirdin sen.
7. Çılgın (âşık) Hâzık misali vuslat (kavuşma) köşesinin ümidiyle;
Ey peri, ne hatırları ne gönülleri virane ettin sen.
بسم الله الرحمن الرحيم
١- سر ژولیده‌می مرغ هوایه لانه ایتدک سن
بنی مجنون مثالی عاقبت دیوانه ایتدک سن
٢- سر گیسویه شایان کورمیوب آتدك بیابانه
دل صد چاکمی دندان شکسته شانه ایتدک سن
٣- اولور هردم نگاهک باده پیما زیر ابروده
عجبدر کوشۀ محرابی صهباخانه ایتدک سن
٤- نه حاجت ساغر خونابه ریز چشم کریانه
نگاه عشوه بازکله بنی مستانه ایتدک سن
٥- مثال قصۀ فرهاد شیرین داستان اولدی
سنکله سرکذشتم سویلنور افسانه ایتدک سن
٦- صریر کلکیم اولدی ناله پیرا سوز حسرتله
بنی بلبل کبی فریاد زن پروانه ایتدک سن
٧- مثال حاذق شیدا امید کنج وصلکله
نه خاطر لر نه دللر ای پری ویرانه ایتدک سن