1. Geşt eyle dehri ser-tâ-ser derd-i dile dermân ara
Ser-çeşme-i hayvânı bul dünyâda bâkî cân ara
2. 'Âlem tabîb olmuş sana nefsin rakîb olmuş sana
Derdin tabîb olmuş sana fehm etmeğe Lokmân ara
3. Bî-hûde gerdiş eyleme efgân u nâliş eyleme
Da'vâ-yı dâniş eyleme var mekteb-i 'irfân ara
4. Yolunda ko cân u seri gafletle gezme ser-serî
Vâdî-i 'aşka düş yürü var sen de bir sultân ara
5. 'Âşıkları ser-hûş eder 'âkılları bî-hûş eder
Her gamzesi med-hûş eder bir âfet-i devrân ara
6. Hâk eyle yollarda yüzün bulunmasın izin tozun
Sür gîceler yere yüzün matlûbunu pinhân ara
7. Hâzık cihânı ser-tâ-ser eyle hemân geşt ü güzâr
Senden seni âgâh eder kâmil vücûd insân ara
1. Dünyayı baştan başa gez, gönül derdine derman ara;
Hayat kaynağını (ab-ı hayatı) bul, dünyada baki (kalıcı) bir can ara.
2. Alem sana tabip olmuş, nefsin sana rakip (düşman) olmuş;
Derdin sana tabip olmuş, (bunu) anlamak için Lokman Hekim ara.
3. Boş yere dönüp durma, feryat ve inleme;
Bilgi iddiasında bulunma, git irfan mektebini ara.
4. Yola canını ve başını koy, gafletle serseri gibi gezme;
Aşk vadisine düş yürü, var sen de bir sultan ara.
5. Aşıkları sarhoş eder, akıllıların aklını başından alır;
Her gamzesi şaşkına çevirir, (böyle) bir devran afeti (güzeli) ara.
6. Yollarda yüzünü toprak et, izin tozun bulunmasın (belli olmasın);
Geceleri yüzünü yere sür, istediğini (matlubunu) gizlice ara.
7. Ey Hâzık, cihanı baştan başa hemen gezip dolaş;
Seni senden haberdar edecek kamil vücutlu bir insan ara.
١- گشت ايله دهرى سرتاسر درد دله درمان آره
سرچشمه حيوانى بول دنياده باقى جان آره
٢-
عالم طبيب اولمش سكا نفسڭ رقيب اولمش سكا
دردك طبيب اولمش سكا فهم ايتميه لقمان آره
٣-
بيهوده گردش ايله مه افغان ونالش ايله مه
دعوى دانش ايله مه وار مكتب عرفان آره
٤-
يولده قو جان وسرى غفلتله كزمه سرسرى
وادى عشقه دوش يورى وارسنده بر سلطان آره
٥-
عاشقلرى سرخوش ايدر عاقلرى بيهوش ايدر
هر غمزه سى مدهوش ايدر بر آفت دوران آره
٦-
خاك ايله يوللرده يوزك بولنمسون ايزك توزك
سور كيجه لر يره يوزك مطلوبكى پنهان آره
٧-
حاذق جهانى سرتاسر ايله همان گشت وگذر
سندن سنى آگاه ايدر كامل وجود انسان آره