1. Ref' edip hâk-i elemden bizi cânân geldi
Pürsiş-i hâtır-ı mûrâne Süleymân geldi
2. Etdi kâşânemizi garka-i envâr-ı cemâl
Tîre gam-hânemize bir ulu mihmân geldi
3. Zevk-i teşrîfi ile buldu hayât-ı ebedî
Gûyâ haste dilin derdine dermân geldi
4. Ortadan çıkmaz idi bezm-i visâl oldukça
Cân bâzârına geldikde 'adûyân geldi
5. Sanma kim safha-i ruhsârda hat etdi zuhûr
'Adl içün gamze-i cânâne fermân geldi
6. Heves-i rûyunla seyr-i gülistâna giden
Şevk ile gitdi velî sonra peşîmân geldi
7. Yalnız kûşe-i mihnetde yatarken Hâzık
Ser-i bâlîn-i dil-i hastaya Lokmân geldi
1. Sevgili bizi elem (keder) toprağından kaldırıp geldi;
Karınca (gibi aciz olan âşığın) hatırını sormaya Süleyman geldi.
2. Güzelliğinin nurlarına köşkümüzü gark etti;
Karanlık gam evimize yüce bir misafir geldi.
3. Teşrifinin (gelişinin) zevkiyle (âşık) sonsuz hayat buldu;
Sanki hasta gönlün derdine derman geldi.
4. Kavuşma meclisi oldukça ortadan hiç çıkmazdı (ayrılmazdı);
İş can pazarına gelince düşmanlar ortaya geldi.
5. Yanak sayfasında ayva tüyleri (hat) belirdi sanma;
Adalet için sevgilinin gamzesine ferman geldi.
6. (Sevgilinin) yüzünün hevesiyle gül bahçesini gezmeye giden;
Şevkle gitti ama sonra pişman olarak geri geldi.
7. Ey Hâzık! Eziyet köşesinde yalnız yatarken;
Hasta gönlün yastığı ucuna (başına) Lokman (Hekim) geldi.
١- رفع ايدوب خاك المدن بزى جانان كلدى
پرسش خاطر مورانه سليمان كلدى
٢-
ايتدى كاشانهمزى غرقۀ انوار جمال
تيره غمخانهمزه بر اولو مهمان كلدى
٣-
ذوق تشريفى ايله بولدى حيات ابدى
كويا خسته دلڭ دردينه درمان كلدى
٤-
اورتهدن چقمز ايدى بزم وصال اولدقجه
جان بازارينه كلدكده عدويان كلدى
٥-
صانمكيم صفحۀ رخسارده خط ايتدى ظهور
عدل ايچون غمزۀ جانانه فرمان كلدى
٦-
هوس رويكله سير گلستانه كيدن
شوقيله كيتدى ولى صكره پشيمان كلدى
٧-
ياڭكز كوشۀ محنتده ياتوركن حاذق
سر بالين دل خستهيه لقمان كلدى