1. Neşve-i sahbâ ile pür-âb u tâb olmuş gelür
Lâle-gûn ruhsârı hem-reng-i şarâb olmuş gelür
2. Raks eder pîrâmeninde zerre-veş dildâdeler
Mâh-tâbım gûyâ bir âftâb olmuş gelür
3. Var mıdır bir kimsede nezâreye tâb u tüvân
Perde-i şerm ü hayâdan der-nikâb olmuş gelür
4. Çîn-der-çîn turralar ebrû-gireh bend-i gazab
Dâl-hançer çeşm-i mestim pür-'itâb olmuş gelür
5. Zevrak-ı 'işret şikest olmuş gumûm-ı dehr ise
Çâr-mevc-i kulzüm-i pür-ıztırâb olmuş gelür
6. Deşne-i ser-tîz-i gamze bahsi kûtâh eylemiş
Münkir-i dîdâr çeşminden mücâb olmuş gelür
7. Gâlibâ tebşîr-i vasla gelür peygâm-res
Ber-zede dâmân şevki pür-şitâb olmuş gelür
8. Terk edüp nâmûs u nengi uğramış meyhâneye
Hâzık-ı şeydâ yine mest ü harâb olmuş gelür
1. Şarap neşesiyle su ve parlaklık dolu (taptaze) olmuş da geliyor;
Lale renkli yanağı tıpkı şarap rengini almış da geliyor.
2. Aşıklar (dildâdeler) onun etrafında zerreler gibi dönerler (raks ederler);
O ay ışığım (ay gibi güzel sevgilim) sanki bir güneş olmuş da geliyor.
3. Bir kimsede ona bakmaya takat ve güç (tâb u tüvân) var mıdır?
(Zira o) utanma ve haya perdesinden yüzünü örtmüş (nikablanmış) de geliyor.
4. Kıvrım kıvrım saçları (turra) ve çatık kaşları gazap bağıdır;
O hançer çeken sarhoş (baygın bakışlı) gözü dopdolu bir azarlamayla (itâb) geliyor.
5. Eğlence (işret) kayığı parçalanmış, dünyanın gamları ise;
Izdırap dolu bir denizin dört bir yandan çarpan dalgası (çâr-mevc) olmuş da geliyor.
6. Yan bakışının o keskin hançeri tartışmayı (bahsi) kısa kesmiş;
Yüzünü (didar) inkar edenler, onun gözünden cevabını almış da (ikna olmuş da) geliyor.
7. Galiba haberci (peygâm-res) kavuşmayı müjdelemeye (tebşîr-i vasla) geliyor;
(Çünkü) eteklerini beline sokmuş (ber-zede dâmân) ve şevkiyle aceleci (şitâb) olmuş da geliyor.
8. Namusu ve arı terk edip meyhaneye uğramış;
O çılgın âşık (şeydâ) Hâzık, yine sarhoş ve harap olmuş da geliyor.
بسم الله الرحمن الرحيم
١- نشوه صهبا ایله پر آب و تاب اولمش كلور
لاله كون رخساری هم رنك شراب اولمش كلور
٢- رقص ایدر پیرامندن ذره وش دلداده لر
ماه تابم كویا بر آفتاب اولمش كلور
٣- وارمیدر بر كیمسه ده نظاره یه تاب و توان
پرده شرم و حیادن در نقاب اولمش كلور
٤- چین در چین طره لر ابروكره بند غضب
دال خنجر چشم مستم پر عتاب اولمش كلور
٥- زورق عشرت شكست اولمش غموم دهر ایسه
چار موج قلزم پر اضطراب اولمش كلور
٦- دشنه سر تیز غمزه بحثی كوتاه ایلش
منكر دیدار چشمندن مجاب اولمش كلور
٧- غالبا تبشیر وصله كلور پیغام رس
بر زده دامان شوقی پر شتاب اولمش كلور
٨- ترك ایدوب ناموس و ننگی اوغره مش میخانه یه
حاذق شیدا ینه مست و خراب اولمش كلور